По невообичаено топлиот викенд, на Балканот пристигнува нагло заладување кое на највисоките планински предели ќе ги донесе и првите снегулки за оваа сезона.
Студениот фронт веќе носи значителен пад на температурите во Србија, каде што по максимални 32 степени се очекува температурите да се намалат за повеќе од 10 степени. Заладувањето ќе биде проследено со дожд и силен северозападен ветер.
Во вторник се очекува дополнително заладување, а границата на снегот на планините ќе се спушти на околу 2.000 метри, локално и до 1.800 метри надморска височина.
Првите снегулки се очекуваат на највисоките делови од Копаоник и Стара Планина, а снег е можен и на Голија, Проклетие и Шар Планина. На Копаоник температурата би можела да се спушти до само 1 степен, а на Панчиќев Врв до околу нулата.
Заладувањето, сепак, се очекува да биде краткотрајно. Веќе од среда се најавува повторно затоплување, со дневни температури над 20 степени.
