Колегиумот на Јавното обвинителство за организиран криминал (ТОК) јавно соопшти дека неговите обвинители во последните месеци трпат сериозен и континуиран притисок од претседателот Александар Вучиќ и од претставници на законодавната и извршната власт, пренесува РСЕ.
Според обвинителството, обидите да се потчини нивната институција започнале онолку брзо колку што почнале и „незгодните“ предистраги – падот на крошната во Нови Сад и одземањето на статусот на културно добро на Генералштабот во Белград. Ситуацијата, велат, уште повеќе ескалирала кога биле собрани докази што укажуваат на можно кривично однесување на министри од Владата на Србија.
Во соопштението се наведува дека таргетирањето преку медиуми, јавни настапи и политички притисоци станало алатка за попречување на нивната работа. Посочуваат дека и во неколку претходни крупни случаи – „Јовањица“, „Шариќ“, „Ќурувија“, „Дијана Хркаловиќ“ – извршната власт се обидувала да влијае врз истрагите.
Дополнително, јавните настапи на Вучиќ и други функционери, како што велат, создаваат лажна слика во јавноста дека обвинителите ги злоупотребуваат своите овластувања и со тоа им помагаат на обвинетите да бараат изземање на обвинителите од случаите.
ТОК порачува дека, и покрај притисоците, нема да подлегнат и ќе продолжат да постапуваат според закон и факти, без оглед кого истрагите ќе го засегнат.
