Албанската полиција заврши долга и високоризична операција во руралниот предел Орош, близу Мердита, при што уапси двајца мажи осомничени за терористички активности. Специјалната акција, наречена „Орош“, траела речиси 12 часа, а осомничените Јулиан Чумраку и Арбен Ука се криеле во напуштена куќа и одбивале да се предадат, пукајќи кон специјалците.
По долги преговори со нивните роднини, двајцата конечно се предале. Ука бил ранет, но е стабилизиран и надвор од животна опасност. Претходно, тие биле под надзор на антитерористичките служби поради сомнежи за врски со терористички групи.
За време на претресот, полицијата пронашла голем арсенал: автоматско оружје, пиштоли, рачни бомби, муниција и материјали за експлозивни направи, како и знамиња на Исламската држава, што ја потврдува нивната радикализација.
Албанските власти истакнуваат дека истрагата продолжува, со цел да се утврди дали двајцата мажи биле дел од поширока терористичка мрежа и дали подготвувале конкретни напади.
