Во јужниот регион на Албанија избувна голем пожар кој зафати општина Финиќ. Во пожарот изгореа две куќи, а жителите на селата Ливина и Ардасово беа евакуирани поради опасност од ширење на огнот. Се вложуваат максимални напори пожарот да не се прошири кон хидроелектраната „Бистрица“, која се наоѓа во близина.
Состојбата е критична во неколку села, меѓу кои Велахово, Ливина, Ардасово, Бистрица и Кронѓ. На терен покрај пожарникарите од Финиќ, Делвина, Кониспол и Саранда се присутни и припадници на армијата, како и министерот за одбрана Пиро Венгу. Пожарот се гаси и од воздух со помош на хеликоптери.
На постарите жители им е обезбедена медицинска помош, а поради безбедносни причини, сообраќајот на патот Музина – Бистрица е ограничен и ќе остане затворен до завршувањето на противпожарните активности.
