Европските земји и Украина подготвија контрапредлог на „рускиот план за прекин на огнот“, кој треба да биде основа за идните разговори меѓу Доналд Трамп и Владимир Путин, пишува Wall Street Journal.
Според документот, прекинот на огнот е првиот чекор, а евентуални територијални разменувања се можни само на реципрочна основа – повлекување на украински трупи би морало да биде проследено со исто повлекување на руската страна.
Планот предвидува сите територијални отстапки од Киев да бидат придружени со цврсти безбедносни гаранции, вклучително и можност Украина да стане членка на НАТО. Целта е да се воспостави заедничка „црвена линија“ за сите идни преговори со Москва.
Предлогот беше презентиран на состанок на советници за национална безбедност, на кој САД ги претставуваа соработници на Трамп. Европските делегати порачаа дека иднината на Украина не може да се решава без нејзино учество и дека поддршката од Европа ќе продолжи без оглед на ставот на Вашингтон.
Контрапредлогот доаѓа пред најавениот состанок Трамп–Путин на 15 август на Алјаска, во услови на шпекулации дека двете страни бараат договор кој би го признаел руското присуство на окупираните територии.
