Долгоочекуваната железничка линија што ќе го поврзе Балканот со Централна Европа доби официјална потврда – Австриските железници (ÖBB) открија дека од 2026 година ќе започнат директни дневни возови меѓу Белград и Виена, преку новата модерна траса што ги поврзува Србија и Унгарија.
Она што долго се криело од јавноста, сега конечно е потврдено: два воза дневно ќе го продолжуваат своето патување од Белград преку Будимпешта до Виена, воспоставувајќи повторно една од најисториските железнички врски меѓу регионот и Европа.
Од „Србијавоз“ и унгарските железници (MÁV) нема официјална изјава – но токму тоа го разбуди интересот. Вистината први ја забележале ентузијасти на железнички форуми, кои откриле дека новите броеви на возови за Белград совпаѓаат со оние што веќе сообраќаат меѓу Будимпешта и Виена.
Додека властите во Белград и Будимпешта молчеле, Австриските железници реагирале веднаш, потврдувајќи за медиумите дека новата линија е навистина во план и дека подготовките се во завршна фаза.
„Заедно со нашиот партнер MÁV, планираме возови кои ќе сообраќаат директно помеѓу Белград, Будимпешта и Виена“, изјавиле од ÖBB, додавајќи дека датумот на пуштање во употреба сè уште не е официјално одреден, но целта е тоа да се случи во текот на 2026 година.
Ова претставува огромен инфраструктурен и економски исчекор – не само за Србија и Унгарија, туку и за целиот регион, кој конечно ќе добие брза и современа железничка врска со срцето на Европа.
