На Западен Балкан, највисока поддршка за Европската унија е регистрирана во Албанија со 91% и во Македонија со 69%, додека Србија покажува најниска поддршка во регионот – само 33%, покажува новото истражување на Европската комисија преку Специјалниот Евробарометар.
Истражувањето открива дека младите Европејци силно ја поддржуваат интеграцијата на земјите кандидати во ЕУ. Околу две третини од испитаниците на возраст од 15 до 39 години сметаат дека потенцијалните кандидати треба да се приклучат кон Унијата откако ќе ги исполнат потребните услови, додека 56% ја поддржуваат понатамошната експанзија на ЕУ и веруваат дека тоа е корисно за нивната земја.
Главните придобивки од проширувањето, според испитаниците, се подобра безбедност и одбрана, посилна економија и глобално влијание на ЕУ. Сепак, 67% од граѓаните сметаат дека не се доволно информирани за процесот на проширување.
Анкетите спроведени во земјите кандидати и потенцијални кандидати покажуваат општа поддршка за приклучување кон ЕУ. На пример, во Источното соседство, Грузија и Украина имаат поддршка од 74% и 68%, додека Албанците имаат најпозитивна слика за ЕУ (82%), а Србија најнизок процент (38%).
Резултатите од анкетата ќе помогнат на Европската комисија да ја вклучи јавноста и во земјите членки и во кандидатите во политиката на проширување, како и да ги подобри информациите за напредокот во процесот на интеграција.
