Илјадници жители на југот на Франција беа принудени да ги напуштат своите домови поради големите шумски пожари што се разгореа под влијание на новиот топлотен бран кој ја зафати Европа.
Според француските власти, повеќе од 10.000 луѓе се евакуирани од повеќе населени места во подножјето на Пиринеите, во близина на границата со Шпанија.
Пожарот избувнал во близина на местото Тревијак, недалеку од Перпињан, и досега зафатил најмалку 4.600 хектари земјиште.
Министерот за внатрешни работи на Франција, Лоран Нуњез, предупреди дека состојбата повторно се влошува, а силниот ветер дополнително го поттикнува ширењето на огнената стихија.
Жителите сведочат дека пламенот се доближил на само 300 метри од куќите, ширејќи се со исклучително голема брзина.
Пожарите влијаат и врз одржувањето на велосипедската трка Тур де Франс. Организаторите ги повикаа навивачите да не присуствуваат на последните 40 километри од третата етапа, за да им се овозможи непречен пристап на противпожарните и спасувачките служби.
Во меѓувреме, претседателката на Европската комисија, Урсула фон дер Лајен, најави дека Европската Унија ќе испрати четири авиони за поддршка во гаснењето на пожарите.
Со слични проблеми се соочува и Шпанија, каде што пожарите уништија повеќе од 2.200 хектари во природниот резерват Ле Гаварес, а околу 500 жители беа евакуирани од националниот парк Сиера де Еспадан.
Метеоролозите предупредуваат дека температурите оваа недела повторно би можеле да достигнат 40 степени Целзиусови во југозападна Франција, додека во делови од Шпанија и Португалија тие веќе ја надминаа оваа граница.
Експертите оценуваат дека екстремните горештини и сè почестите шумски пожари се поврзани со климатските промени, при што Европа останува континентот што се загрева најбрзо во светот.
