Американскиот претседател Доналд Трамп изјави дека разговорите за ставање крај на војната во Украина се „многу поблиску отколку што луѓето мислат“, по телефонскиот разговор што го имал со рускиот претседател Владимир Путин.
Говорејќи на настан во Белата куќа, Трамп рече дека разговорот со Путин бил конструктивен и изрази уверување дека постои реална можност за напредок кон мировно решение.
„Претседателот Путин исто така сака војната да заврши. Верувајте ми кога ви го кажувам тоа. Тоа беше добар разговор. А претседателот Зеленски сака таа веднаш да заврши“, изјави Трамп.
Тој додаде дека верува оти страните се приближуваат кон крајот на конфликтот.
„Имав многу добар разговор и мислам дека се приближуваме кон крајот“, рече американскиот претседател.
Во пресрет на самитот на НАТО, кој треба да започне во вторник во Анкара, Трамп најави дека прашањето за Украина ќе биде една од главните теми на разговорите со сојузниците.
Војната во Украина трае од февруари 2022 година, кога Русија ја започна својата целосна инвазија. Во изминатиот период продолжија ракетните напади врз украинските градови, додека украинските сили изведуваат напади врз руска воена и енергетска инфраструктура.
