Хрватската полиција соопшти дека по 35 години ја завршила криминалистичката истрага за убиството на две жени во подрум на семејна куќа, извршено за време на војната во септември 1991 година, во местото Греѓани, во близина на Топуско.
За тешкото воено злосторство е осомничен 76-годишен маж, кој во моментот е недостапен за хрватските органи на прогонот.
Според информациите од Полициската управа Сисачко-мославинска, истрагата била спроведена во координација со Одделот за воени злосторства при Жупаниското државно обвинителство во Загреб.
Постои основано сомнение дека осомничениот во септември 1991 година бил припадник на паравоените формации на таканаречената САО Краина, односно на Третиот кордунашки одред.
Облечен во воена униформа и вооружен, тој наводно пристигнал во дворот на семејна куќа во Греѓани, која била делумно оштетена од воените дејствија.
Во подрумот се наоѓале две цивилки, на возраст од 80 и 55 години.
Според сомневањата на истражителите, мажот испукал повеќе куршуми кон жените, нанесувајќи им смртоносни повреди.
Двете жртви починале на самото место.
Полицијата смета дека постојат основи за сомневање за воено злосторство против цивилното население, односно прекршување на правилата на меѓународното хуманитарно право за време на вооружен судир.
По завршувањето на истрагата, против 76-годишникот е поднесена кривична пријава до надлежното обвинителство во Загреб.
Осомничениот засега не е достапен за хрватските власти, а неговата евентуална кривична одговорност треба да биде утврдена во судска постапка.
