Сериозен случај на пријавено семејно насилство во Кратовско е предмет на полициска постапка, откако 42-годишна жена од Босна и Херцеговина пријавила дека нејзиниот партнер физички ја напаѓал и ја принудувал на сексуални дејствија.
Според информациите од Министерството за внатрешни работи, жената живеела во вонбрачна заедница со 46-годишниот И. Д. во село на подрачјето на Кратово.
Случајот првпат бил пријавен на 5 ноември 2026 година во СВР Куманово, по што полицијата извршила службен разговор со двајцата партнери.
Жената тогаш изјавила дека го слушнала партнерот како разговара со други жени, по што побарала пари за да го напушти заедничкиот дом, но тој одбил да ѝ ги даде.
По разговорот, мажот бил предупреден, а жената била спроведена во Прифатниот центар за странци во Скопје за понатамошна постапка.
На 10 ноември, Националната мрежа против семејно насилство доставила дополнителна пријава до ОВР Кратово.
Според пријавата, жената во текот на заедничкиот живот била изложена на физички напади и принудување на сексуални дејствија од страна на партнерот.
По извршените медицински прегледи, било констатирано дека 42-годишната жена е бремена и има хематоми на одделни делови од телото.
Од Министерството за внатрешни работи информираат дека се преземаат мерки за целосно утврдување на околностите и расчистување на случајот.
