Брачниот пар Алан и Кејти Донеган успеале да се пензионираат на само 40 и 35 години, откако со години живееле исклучително штедливо и успеале да заштедат и инвестираат околу еден милион фунти.
Тие велат дека нивната цел никогаш не била да се лишуваат од сè, туку да купат нешто многу повредно – финансиска слобода.
Во зимските месеци речиси никогаш не го вклучувале греењето, туку се затоплувале со повеќе слоеви облека и шишиња со топла вода. Речиси никогаш не нарачувале храна, туку секојдневно носеле подготвен ручек од дома.
„Само со навиката да носиме ручек на работа заштедивме околу 40.000 фунти за десет години“, вели Алан.
Двојката внимателно го планирала секој трошок и поголемиот дел од заштедените средства ги инвестирала. Според нив, секоја инвестирана фунта ги приближувала до животот што го посакувале.
Тие се дел од движењето FIRE (Financial Independence, Retire Early), чија цел е преку дисциплинирано штедење и инвестирање да се постигне финансиска независност и можност за многу порано пензионирање.
Иако ваквиот начин на живот за многумина изгледа премногу строг, движењето FIRE станува сè попопуларно низ светот. Поддржувачите сметаат дека краткорочните откажувања овозможуваат долгорочна слобода, додека критичарите предупредуваат дека ваквиот модел не е лесно применлив за сите, особено во услови на високи трошоци за живот и растечки цени на недвижностите.
Како пример се наведува и Американката Ејми Минкли, која се пензионирала на 44 години. Работејќи во меѓународни училишта во Азија, живеејќи скромно и избегнувајќи непотребни трошоци, успеала да заштеди доволно средства за денес да живее на Бали, каде што нејзините приходи имаат значително поголема куповна моќ.
