Многу корисници со години веруваа дека оставањето на телефонот на полнач преку ноќ ја оштетува батеријата. Сепак, кај современите паметни телефони тоа повеќе не претставува сериозен проблем, бидејќи уредите имаат вградени системи што автоматски го запираат полнењето кога батеријата ќе го достигне зададениот капацитет.
Кај iPhone, достапна е функција што го ограничува полнењето на околу 80 проценти, додека многу Android уреди нудат слични опции за заштита на батеријата.
Кај поновите Samsung Galaxy телефони со One UI 7, кога ќе се активира максималната заштита на батеријата, во иконата за батерија се појавува симбол на штит. Тоа означува дека телефонот автоматски ќе престане да се полни кога ќе го достигне поставениот процент, а ќе продолжи повторно дури кога нивото на батеријата ќе се намали под таа граница.
Корисниците можат сами да изберат до колку проценти ќе се полни батеријата – 80, 85, 90 или 95 проценти. Доколку е избрана основната заштита, телефонот ќе се наполни до 100 проценти, а потоа повторно ќе започне со полнење кога нивото ќе падне на околу 95 проценти.
Експертите објаснуваат дека литиум-јонските батерии најмногу се оптоваруваат во последната фаза од полнењето, односно кога се движат од околу 80 до 100 проценти. Затоа ограничувањето на максималното полнење може да помогне батеријата подолго да го задржи својот капацитет.
Покрај нивото на полнење, важно е да се избегнува и прегревање на телефонот, особено при полнење со дебела заштитна маска или во многу топла средина. Исто така, се препорачува користење оригинален или сертифициран полнач, бидејќи несоодветните полначи можат негативно да влијаат врз батеријата и работата на уредот.
