Американскиот претседател Доналд Трамп го потпиша „Lindsey O. Graham Sanctioning Russia and Iran Act of 2026“, со кој се прошируваат санкциите кон Русија и Иран, а на американската администрација ѝ се дава овластување да воведе царини до 100 отсто за одредени земји што купуваат руска нафта или природен гас.
Законот беше усвоен во Претставничкиот дом на САД на 16 септември, откако претходно беше одобрен и во Сенатот. Со потписот на Трамп на 18 септември, законското решение стапи на сила.
Новите одредби му овозможуваат на американскиот претседател да воведе царини до 100 проценти за стоките што се увезуваат од петте најголеми купувачи на руска сурова нафта или природен гас, како и за петте земји кои се идентификуваат како најголеми олеснувачи на заобиколувањето на санкциите поврзани со руската нафта.
Меѓу земјите кои би можеле да бидат опфатени со оваа мерка се Кина и Индија, кои се меѓу најголемите купувачи на руска нафта. Сепак, висината на царината не е однапред фиксно утврдена на 100 отсто, туку законот му остава можност на претседателот и американската администрација да ја одредат стапката, во рамките на законски дозволениот максимум.
Предвидени се и исклучоци. Меѓу другото, одредени земји со ограничена зависност од рускиот природен гас може да бидат изземени доколку преземаат значителни чекори за дополнително намалување или прекин на увозот од Русија.
Законот опфаќа санкции против руски функционери, олигарси и други лица и субјекти поврзани со руската влада, како и против руски банки и финансиски институции. Дополнителни мерки се насочени кон рускиот енергетски и одбранбен сектор.
Посебно внимание е посветено на таканаречената „флота во сенка“ – мрежа од танкери, пловила и други субјекти за кои американските власти сметаат дека се користат за заобиколување на санкциите и ограничувањата поврзани со извозот на руската нафта.
Законот истовремено ги продолжува американските санкции поврзани со Иран, вклучително и санкциската рамка од 1996 година, која со новото законско решение се продолжува за уште пет години.
Мерката го носи името на покојниот американски сенатор Линдзи Греам, кој беше еден од главните поддржувачи на заострувањето на санкциите кон Русија. Законодавната иницијатива беше продолжена и довршена по неговата смрт, а во нејзиното усвојување учествуваа сенатори од двете партии.
