Минхен во сабота, 19 септември, официјално го отвора годинашниот Октоберфест, а организаторите и градските власти оваа година воведуваат дополнителни мерки за да спречат создавање опасно големи гужви на фестивалскиот простор. Меѓу новитетите е и употребата на вештачка интелигенција, која ќе го следи движењето на посетителите и ќе сигнализира кога концентрацијата на луѓе ќе стане преголема.
Традиционално, градоначалникот на Минхен ќе го отвори првото буре пиво со познатата изрека „O'capft is“, со што ќе биде означен официјалниот почеток на 191. издание на Октоберфест. Фестивалот ќе трае до 4 октомври.
Октоберфест важи за најголемата народна прослава во светот. На целиот фестивалски простор е забрането консумирање канабис, додека алкохолни пијалаци се дозволени.
Една мера пиво, односно литар во традиционална кригла, годинава ќе чини од 14,80 до 15,90 евра, што претставува умерено зголемување во однос на минатогодишните цени.
Посетителите кои ќе сакаат да се освежат со вода ќе треба да издвојат до 11 евра за литар обична вода. Сепак, на фестивалскиот простор има и неколку чешми со вода за пиење кои можат да се користат бесплатно.
Посебно внимание треба да посветат оние кои планираат да купуваат во фестивалските локали, бидејќи дел од нив и понатаму прифаќаат исклучиво готовина. За оние кои ќе останат без пари, на располагање има банкомати на самата локација.
За љубителите на забавните атракции има бројни можности, но организаторите советуваат посетителите да бидат што е можно потрезни доколку планираат да се качуваат на возењата. Цените на атракциите се движат од нешто помалку од пет до 14 евра.
Германската традиција на патувачки забавувачи и сопственици на фестивалски атракции во 2026 година официјално е ставена на листата на нематеријално културно наследство на УНЕСКО. Таа традиција е силно присутна и на Октоберфест, каде што, според организаторите, околу 90 отсто од повеќе од 130 забавни и угостителски претпријатија имаат корени кои датираат уште од 19 век.
Традиционално облечените посетители од Баварија најчесто пристигнуваат во народна носија. За останатите посетители носењето кожни панталони или дирндл не е задолжително, но токму ваквата облека е дел од препознатливата атмосфера на фестивалот. Градската служба задолжена за промоција на манифестацијата дури ги советува оние кои првпат го посетуваат Октоберфест да размислат за изнајмување традиционална носија.
Фестивалот се одржува на огромна површина. Терезината ливада, каде што се поставени шаторите и атракциите, зафаќа околу 34,5 хектари, што приближно одговара на површина од 48 фудбалски игралишта.
Токму големиот број посетители, особено во викендите, претставува еден од најголемите предизвици. Минатата година во одредени моменти влезовите морале да бидат затворени поради преголемата гужва.
Проблемот дополнително се создава поради организацијата на резервираните места. Во речиси сите 38 фестивалски шатори посетителите се распоредуваат во две или три резервирани смени. Кога доаѓа време за промена на гостите во 14-те големи шатори, од кои секој може да прими по неколку илјади луѓе, во ист момент огромен број посетители се обидуваат да влезат и да излезат.
Поради искуствата од минатата година, Минхен оваа година го промени безбедносниот план. Формиран е и нов координативен центар, чија цел е побрза и поефикасна размена на информации меѓу безбедносните служби и организаторите.
На просторот на фестивалот се поставени 26 нови камери, покрај 56-те полициски камери кои веќе се користат. За безбедноста ќе се грижат и околу 600 полицајци ангажирани на терен.
Новина е и употребата на вештачка интелигенција за следење на движењето на посетителите. Системот треба да препознае кога одреден дел од просторот станува премногу густ и да испрати предупредување до надлежните, со цел навреме да се реагира и да се спречи создавање критични гужви.
Организаторите и полицијата предвиделе и мерки за заштита од евентуално неовластено користење дронови над фестивалскиот простор. Деталите за овие безбедносни мерки, сепак, не се соопштени.
