Женева денеска се претвори во најчуваната дипломатска точка во Европа. Од раните утрински часови низ градот се забележани колони американски дипломатски возила, а највисоки претставници од САД, Украина и европските сили веќе се собираат за клучните разговори што треба да го одредат исходот на украинската војна.
Специјалниот пратеник Стив Виткоф, државниот секретар Марко Рубио и секретарот на Армијата Даниел Дрискол се дел од американската делегација која учествува на преговорите. Од украинска страна, делегацијата ја води Андриј Јермак – најблискиот соработник на претседателот Зеленски, придружен од безбедносни и политички советници.
На масата седнува и таканаречениот Е3 блок – Франција, Британија и Германија – заедно со Европската Унија и претставник од Италија. Според дипломатски извори, се очекува учество и на Канада, која веќе најави директни консултации со Киев.
Сите тие разговараат за американскиот нацрт–план од 28 точки, кој предизвика бурни реакции: документот бара Украина да се откаже од дел од територијата, да прифати ограничувања на својата армија и да се откаже од амбициите за НАТО. Трамп порача дека тоа „не е конечната понуда“, но му постави рок на Зеленски – до четврток.
Западните лидери сметаат дека американскиот план може да биде основа за договор, но признаваат дека „се потребни сериозни измени“ за Киев да го прифати. Од друга страна, Москва веќе го поздрави документот, но најавува дека ќе се спротивстави на делови од него.
Во пресрет на овие разговори, Зеленски предупреди дека Украина ризикува да ја изгуби и својата слобода и поддршката од сојузниците доколку се прифати лош договор.
Женева денеска станува дипломатска арена во која – барем според оценките на учесниците – може да почне крајот на најголемата европска војна во последните децении. Сепак, напнатоста околу условите, роковите и територијалните барања покажува дека вистинската битка во преговорите дури започнува.
