Несекојдневен инцидент се случил на автопат во Шпанија, каде петмина маскирани мажи, облечени во црно и со елеци на кои имало полициски ознаки, пресретнале автомобил, го извлекле возачот од возилото и го однеле со себе.
Настанот се случил во саботата во близина на Виланова дел Валес, пред очите на повеќе возачи кои се нашле на автопатот. Снимките од инцидентот набрзо се прошириле на социјалните мрежи, по што случајот го презела каталонската полиција.
Според досегашните информации, петмината напаѓачи се претставиле како полицајци за да го запрат автомобилот. Некои од нив, според снимките, биле вооружени.
Откако го запреле возилото, мажот бил насилно извлечен и префрлен во друго возило. Сведоци на настанот веднаш ја повикале службата за итни случаи на бројот 112, бидејќи и покрај полициските ознаки, однесувањето на групата им изгледало сомнително и не личело на официјална полициска интервенција.
Киднапираниот маж бил ослободен по неколку часа. Подоцна бил пронајден со сериозни повреди, но според достапните информации бил надвор од животна опасност.
Шпанскиот портал „Ел Касо“ објави дека жртвата неодамна била пуштена од затвор. Токму оваа информација е еден од елементите што истражителите го разгледуваат при утврдувањето на мотивот за нападот.
Една од главните истражни линии е можна поврзаност со трговија со дрога и одмазда, но полицијата засега официјално не ја потврдила оваа претпоставка. Нема информации дека за жртвата бил побаран откуп, поради што случајот се разгледува како незаконско лишување од слобода, а истражителите проверуваат и сомнение за лажно претставување.
Истрагата ја води Одделот за кривични истраги на регионот Метрополитана Норд. Полицајците работат на идентификување на петте осомничени лица, а се проверуваат и возилата употребени за време на нападот, како и можната поврзаност меѓу жртвата и напаѓачите.
Засега нема информации за уапсени лица. Истражителите ги анализираат снимките што ги направиле очевидци, како и материјалите од надзорните камери поставени долж автопатиштата.
Случајот се истражува во контекст на уште еден неодамнешен инцидент во Каталонија. Само неколку дена претходно, во Сабадел бил пронајден маж со прострелна повреда, кој претходно бил нападнат во Гава, а полицијата и тој случај го разгледувала во врска со трговија со дрога.
