Тешка сообраќајна несреќа го потресе градот Бугенхаут во Белгија, каде што дошло до директен судир помеѓу воз и училишен минибус на железнички премин. Според локалните медиуми, трагедијата се случила во утринските часови и завршила со повеќе загубени животи.
Во минибусот се превезувале седум деца, еден придружник и возачот, кога дошло до судирот со возот. Според првичните информации, во несреќата животот го загубиле четири лица – две деца, возачот и придружникот.
Белгискиот федерален министер за мобилност, Жан-Лук Крук, потврдил дека станува збор за сериозна трагедија и изјавил дека железничкиот премин бил затворен во моментот на несреќата. Тој нагласил дека постојат снимки кои го потврдуваат тоа.
Несреќата се случила околу 8:08 часот наутро, кога училишниот автобус влегол на преминот. Според надлежните служби, камерите покажуваат дека заштитните рампи биле спуштени, а семафорот на преминот бил црвен, што дополнително ја прави ситуацијата нејасна и предмет на истрага.
По судирот, околу 100 патници од возот биле евакуирани и им била укажана медицинска помош. Во меѓувреме, децата и возрасните кои биле во минибусот се наоѓале во центарот на спасувачката акција.
Истрагата за причините за оваа тешка несреќа продолжува, а надлежните институции се обидуваат да утврдат како дошло до трагичниот настан и покрај активните безбедносни системи на преминот.
