Инцидент кој предизвика вознемиреност кај граѓаните се случил денеска во Загреб, кога маж на прометна градска раскрсница почнал да се качува и да скока врз автомобили кои чекале на семафор.
Настанот се случил на раскрсницата на Авенија Вечеслав Хољевац со улиците Дамир Томљановиќ и Радослав Цимерман, во близина на Бундек. Очевидци велат дека мажот се однесувал невообичаено, движејќи се по возилата и удирајќи по нив, при што предизвикал штета и паника меѓу возачите.
Видео-снимка објавена од медиумот „Индекс.хр“ покажува како лицето се качува на автомобил, гестикулира и потоа скока од возилото на коловозот, додека сообраќајот е во прекин и возачите се обидуваат да се извлечат од ситуацијата.
Полицијата брзо реагирала по дојави од граѓани околу 12:15 часот, кога биле известени дека лице оштетува возила на раскрсницата. Полицајците пристигнале на местото и го совладале мажот со употреба на присилни средства.
Според соопштението од загрепската полиција, на лице место интервенирала и итната медицинска помош, која го прегледала мажот, по што тој бил пренесен во соодветна здравствена установа за понатамошен третман и проценка.
Истрагата за причините за ваквото однесување е во тек, а се утврдува и точната материјална штета што ја претрпеле сопствениците на оштетените возила.
