Ко Фи Фи, една од најпознатите туристички дестинации во светот, повторно е во центарот на вниманието, но овојпат поради сцени што многумина ги нарекоа „вистински ноќен кошмар“.
На социјалните мрежи масовно се шири видео од огромни толпи туристи собрани на островот, каде што наместо мирни плажи и тропски рај, посетителите се соочуваат со метеж, долги редици и хаотична атмосфера.
Островот стана светски познат по филмот The Beach на режисерот Дени Бојл, во кој главната улога ја толкуваше Леонардо Ди Каприо.
Токму успехот на филмот ја претвори плажата Маја Беј во една од најпосетуваните локации во Тајланд, но со текот на годините масовниот туризам почна сериозно да ја уништува природата и нормалното функционирање на островот.
Во видеото што стана вирално на Reddit се гледаат стотици туристи збиени еден до друг уште пред да стигнат до самата плажа.
Реакциите на интернет беа жестоки.
„Апсолутно ништо не изгледа забавно таму“, напишал еден корисник, додека друг коментирал дека неодамна бил на островот и дека поради огромната гужва воопшто не можел да ужива.
Трет кратко порачал: „Каков ноќен кошмар“.
Поради сериозните последици од прекумерниот туризам, властите претходно дури и целосно го затворија заливот Маја Беј на неколку години, откако беа уништени коралите и беше загрозен морскиот свет.
4
Островот повторно беше отворен во 2022 година, но со строги ограничувања – ограничен број посетители, забрана за ноќевање, ограничен престој и забрана за користење креми за сончање во водата.
Сепак, и покрај мерките, туристичките компании признаваат дека ситуацијата и натаму е проблематична.
Покрај Маја Беј, сериозен притисок трпи и главниот остров Ко Фи Фи Дон, кој според туристичките агенции станал едно од најпренаселените места во регионот.
Поради тоа, дел од агенциите за одржлив туризам сè повеќе ги насочуваат туристите кон помалку познати, но подеднакво убави острови како Ко Тап, Ко Пода и Ко Каи, каде што сè уште може да се почувствува мирната атмосфера и природната убавина без огромните толпи луѓе.
