Вистинска драма се одвивала за време на аеромитинг во американската држава Ајдахо, кога два воени авиони се судриле во воздух при демонстративен лет, предизвикувајќи паника меѓу присутните посетители.
Инцидентот се случил за време на настап во воздухопловната база Маунт Хоум, а според информациите, станува збор за авиони на американската морнарица тип EA-18G Growler од 129-та ескадрила за електронски напад.
Како што пренесуваат американските медиуми, до судирот дошло додека пилотите изведувале воздушни маневри во рамки на програмата на аеромитингот. Снимките кои брзо се проширија на социјалните мрежи го покажуваат моментот на силниот удар меѓу леталата, по што следувале драматични сцени на небото.
Само неколку секунди по судирот, четворицата членови на екипажот успеале навреме да се катапултираат. На видеата може да се забележат четири падобрани кои се отвораат додека оштетените авиони паѓаат кон земјата во близина на базата.
Од американската морнарица потврдија дека медицинските тимови веднаш реагирале и ги прегледале сите членови на екипажот, при што било утврдено дека се во стабилна состојба.
Надлежните институции започнале истрага за причините кои довеле до несреќата, а засега не се откриваат дополнителни детали за околностите под кои дошло до судирот.
Според организаторите на настанот, на земја немало повредени лица, иако инцидентот предизвикал голема вознемиреност кај посетителите. По несреќата, аеромитингот бил привремено прекинат, а на местото веднаш пристигнале итните служби и противпожарни екипи.
Пожарот кој избувнал по падот на леталата подоцна бил ставен под контрола, а посетителите безбедно ја напуштиле воздухопловната база.
