Сериозен инцидент се случил во трговски центар во скопската општина Аеродром, каде малолетник бил физички нападнат, а во обид да спречи поголем конфликт повреден бил и 25-годишен маж.
Според информациите од Министерството за внатрешни работи, случајот бил пријавен на 17 мај 2026 година околу 13:50 часот, кога 36-годишна жена од Скопје пријавила дека нејзиниот 16-годишен син бил нападнат претходната вечер.
Инцидентот се случил на 16 мај околу 22:30 часот пред продажен објект во трговски центар во Аеродром. Според пријавата, 16-годишникот бил физички нападнат од друг малолетник на иста возраст, кој при нападот употребил и тврд предмет.
Настанот не завршил тука. Во обид да го заштити нападнатиот малолетник и да спречи ескалација, интервенирал 25-годишниот М.Д. од Скопје, но и тој бил нападнат од малолетникот.
Од МВР потврдуваат дека и самиот М.Д. го пријавил случајот во полиција. Тој навел дека бил физички нападнат додека се обидувал да одбрани друг малолетник за време на инцидентот во трговскиот центар.
За целиот случај бил известен јавен обвинител за малолетници, додека полицијата презема мерки за целосно расчистување на настанот и утврдување на сите околности поврзани со инцидентот.
