Полската полиција спровела голема операција во станбена зграда во градот Островјец Швјентокшиски, поврзана со осомничениот за крвавиот напад во Краков, во кој беа убиени шест лица.
На социјалните мрежи се појавила снимка од полициската интервенција, објавена на Фејсбук-страницата на локалното Радио Островјец. На видеото се гледа како полициските службеници влегуваат во стан поврзан со напаѓачот.
Токму во тој стан, според информациите на полските медиуми, биле пронајдени телата на три лица – две жени и еден маж.
Полскиот портал „Онет“ неофицијално објавил дека станува збор за родителите и сестрата на осомничениот.
Доналд Туск го потврди пронаоѓањето на телата
Полскиот премиер Доналд Туск го потврдил пронаоѓањето на трите тела, посочувајќи дека сите индиции упатуваат на тоа дека починатите се членови на најтесното семејство на осомничениот.
За време на полициската операција, целата станбена зграда била евакуирана, а на терен биле испратени и припадници на антитерористичките единици.
Според информациите на „Онет“, телата биле откриени со помош на полициски дрон.
Истражителите сè уште ги утврдуваат околностите под кои настапила смртта на тројцата пронајдени, вклучително и можноста дека ги убил осомничениот за нападот во Краков.
Засега, овие три смртни случаи не се вклучени во билансот од шесте убиени лица во Краков.
Во автомобилот пронајден арсенал оружје
Во багажникот на автомобилот што го користел напаѓачот биле пронајдени воен ранец, делови од воена опрема и бајонет.
Полицијата претходно потврдила дека во возилото имало и дополнително огнено оружје и муниција.
Продолжил да пука во полицајците и откако бил ранет
Мажот осомничен за убиството на шест лица во центарот на Краков имал дозвола за поседување огнено оружје, објави „Ројтерс“, повикувајќи се на портпаролот на полската полиција, Анджеј Фјолек.
Портпаролката на краковската полиција, Катажина Число, изјавила дека осомничениот продолжил да пука кон полициските службеници дури и откако бил ранет во интервенцијата.
Нејзината изјава ја пренела новинската агенција „Асошиејтед прес“.
Полските истражители продолжуваат да ги утврдуваат сите околности поврзани со нападот во Краков, како и со смртта на трите лица пронајдени во станот во Островјец Швјентокшиски.
