Припадници на Министерството за внатрешни работи на Србија откриле нелегална лабораторија за одгледување марихуана во Зрењанин, при што биле уапсени тројца осомничени, меѓу кои и припадник на Жандармеријата.
Во координација со Вишото јавно обвинителство во Зрењанин, полицијата ги привела Ж. Г. (1983), припадник на Жандармеријата, М. Г. (1962) и Ј. Г. (1963).
Тројцата се осомничени дека сториле кривично дело неовластено производство и ставање во промет на опојни дроги.
Запленети 81 растение и околу 7,5 килограми сува материја
При претресот на станот и другите простории што ги користеле осомничените, полициските службеници пронашле и заплениле 81 стебло што наликува на индиски коноп.
Покрај тоа, биле пронајдени и околу 7,5 килограми сува растителна материја за која постои сомнение дека е марихуана.
Полицијата одзела и ваги за мерење, како и опрема што, според сомневањата, била користена за одгледување марихуана.
По налог на Вишото јавно обвинителство, на сите тројца осомничени им е одредено задржување до 48 часа.
По истекот на рокот, тие ќе бидат спроведени пред надлежниот обвинител заедно со кривична пријава.
