Воениот конфликт во Судан предизвика хуманитарна катастрофа од невидени размери – 25 милиони луѓе се соочуваат со сериозен недостиг на храна, а здравствениот систем е пред целосен колапс, предупредува Светската здравствена организација (СЗО).
Од јули минатата година до денес, речиси 100.000 случаи на колера се регистрирани во земјата, што е алармантен показател за влошените санитарни услови и неможноста на здравствените институции да одговорат на кризата. Високиот функционер за итни случаи во СЗО, Илхам Нур, изјави дека „континуираното насилство го уништува здравствениот систем и ја продлабочува кризата со глад и болести“.
Посебно загрижува фактот што околу 770.000 деца под пет години се очекува да страдаат од сериозен недостаток на храна оваа година, што ја прави ситуацијата уште поитна. Според СЗО, гладот и болестите делуваат заедно, создавајќи спирала на страдање која го загрозува опстанокот на цела една нација.
Во Судан моментално се води една од најтешките хуманитарни битки на светот, а повиците за меѓународна помош сè повеќе се засилуваат.
