Американскиот претседател Доналд Трамп изјави дека не очекува рускиот претседател Владимир Путин да нападне територија на НАТО, само два дена по ненадејната посета на директорот на ЦИА, Џон Ратклиф, на Москва.
„Имав добри разговори со него. Тој нема да нападне територија на НАТО“, изјавил Трамп пред новинарите во Овалната соба.
Изјавата следува по медиумските извештаи дека Ратклиф отпатувал во Москва на разговори со шефот на руската Служба за надворешно разузнавање, Сергеј Наришкин.
„Волстрит џурнал“ и „Си-Би-Ес њуз“ објавија дека една од причините за посетата била да се пренесе предупредување до Москва во контекст на американските разузнавачки проценки за можноста Русија во иднина да се обиде да ја тестира решителноста на НАТО.
Трамп, сепак, не сакал да потврди дека Ратклиф пренел таква порака.
„Не сакам да коментирам за тоа, но тие нема да нападнат“, изјавил американскиот претседател.
Трамп: Посетата била поврзана со Украина
Во одделно интервју со радио водителот Глен Бек, Трамп го намалил значењето на посетата, опишувајќи ја како повеќе или помалку рутинска и поврзувајќи ја со напорите за завршување на војната во Украина.
Тој ги отфрлил медиумските наводи дека во разговорите биле вклучени НАТО и американскиот притисок врз Иран.
Од Москва слична порака испратил и Наришкин, кој потврдил дека средбата се одржала, но рекол дека во неа немало ништо необично.
Според изјавата што ја пренесе ТАСС, двајцата разузнавачки шефови разговарале за повеќе прашања што се во надлежност на нивните служби. Наришкин не открил конкретни детали, посочувајќи дека станува збор за чувствителни теми.
Од Брисел велат дека не гледаат непосреден напад
Во меѓувреме, висок претставник на Европската Унија, кој зборувал анонимно, изјавил дека европските служби во моментов не располагаат со проценка дека Русија подготвува напад врз европските земји или членките на НАТО.
Тврдењето на Трамп дека Путин „нема да го нападне НАТО“ сепак претставува негова политичка проценка, а не гаранција за идните потези на Москва.
Што точно било договорено или разговарано зад затворени врати меѓу Ратклиф и Наришкин засега не е јавно соопштено.
