Ролеркостерот X2 во забавниот парк Six Flags Magic Mountain во Јужна Калифорнија се најде во центарот на сериозни обвинувања, откако адвокати тврдат дека повеќе од 100 луѓе претрпеле повреди на мозокот по возењето на оваа атракција.
Адвокатот Кристофер Булон, кој застапува оштетени во повеќе граѓански постапки, изјави дека операторот на забавниот парк бил свесен за ризиците. Тој најави поднесување три тужби против операторот.
„Сикс Флегс свесно се коцкале со животите на луѓето. Не треба да се дозволи да постои никакво вакво возење“, изјавил Булон.
X2 со години е една од главните атракции на Six Flags Magic Mountain во Валенсија, Калифорнија. Ролеркостерот е познат по седиштата што ротираат, речиси вертикалните падови и наглите промени во движењето, а привлекува посетители кои бараат силни возбудувања.
Тврдењата за повреди поврзани со атракцијата датираат повеќе од една деценија, но случајот неодамна повторно привлече големо внимание по истрагата на CNN, која документирала повеќе извештаи за сериозни повреди и хоспитализации поврзани со X2.
Според адвокатите, во последните две години повеќе од 100 нивни клиенти тврдат дека претрпеле различни степени на повреди на мозокот по возењето на ролеркостерот.
Само во јули, две жени со само шест дена разлика биле примени во истата итна медицинска служба во Санта Кларита по возењето на X2.
Адвокатите велат дека биле контактирани и од стотици други луѓе. Дел од нив, сепак, не можеле да поднесат тужби бидејќи истекол рокот за застареност, кај други повредите не биле поврзани со мозокот, а некои немале медицинска документација за лекување.
CNN наведува дека не можел независно да ги потврди сите тврдења на луѓето кои неодамна контактирале со адвокатите.
Две жени завршиле на итна операција
Две од најновите тужби се однесуваат на 26-годишната Наоми Грир-Вилкинсон и 40-годишната Памела Гилен.
Според тужбите, двете жени ја изгубиле свеста по излегувањето од X2 и морале итно да бидат оперирани поради тешки трауматски повреди на мозокот.
Според медицинските наоди наведени во материјалите што ги прегледал CNN, хирурзите оцениле дека повредите биле последица на наглите забрзувања и забавувања што ги доживеале додека се возеле на X2.
Гилен претходно раскажала дека по повредата морала повторно да учи да зборува и да оди. Таа се соочува и со силни главоболки и проблеми со концентрацијата, а користи и терапија за спречување на напади.
Грир-Вилкинсон, според информациите наведени во тужбата, сè уште е во кома, додека нејзиното семејство се надева дека еден ден ќе се разбуди.
Во третата тужба поднесена во понеделникот, адвокатот од Лос Анџелес, Мајкл Вилк, тврди дека претрпел сериозно крварење во мозокот по возењето на X2 во февруари и дека поради повредите морал да биде подложен на повеќе операции.
Вилк изјавил дека повредите оставиле трајни последици врз неговиот живот. Тој има силни главоболки, проблеми со меморијата и концентрацијата и вели дека повеќе не може да ја извршува адвокатската професија како порано.
Парковите и регулаторите се под притисок
Six Flags одбил да ги коментира новите обвинувања, со образложение дека не разговара за тековни судски постапки.
Од компанијата претходно одбиле да одговорат на конкретни прашања поврзани со X2, наведувајќи само дека „возилото моментално е затворено“.
Адвокатите на операторот во претходни судски постапки го бранеле ролеркостерот кога посетители или нивни семејства поднесувале тужби поради повреди.
Во тие постапки било посочувано дека посетителите со знаците пред атракцијата се предупредуваат дека постојат вродени ризици при користењето на забавните возила и атракции.
Одбраната исто така тврдела дека X2 редовно се тестира и дека физичките сили што ги чувствуваат патниците не се доволно силни за да предизвикаат трауматска повреда на мозокот кај „нормален“ возач кој ја користи атракцијата според упатствата.
Се споменуваат и смртни случаи
Случајот повторно го отвори и прашањето за смртните случаи кои наводно се поврзуваат со X2.
Адвокатот Тимоти Лорангер, чија канцеларија го застапувала семејството на 22-годишниот Кристофер Холи, кој починал од трауматска повреда на мозокот по возењето на X2 пред четири години, изјавил дека неговата фирма во меѓувреме добила нови клиенти со тврдења за повреди од оваа атракција.
Меѓу нив, според адвокатите, има случаи кои се движат од сериозни потреси на мозокот до крварења во мозокот.
Адвокатите на едно семејство тврдат и дека млад човек починал по возењето на X2 кон крајот на 2025 година. Доколку овие наводи се потврдат, тоа би бил најмалку третиот смртен случај што се поврзува со атракцијата.
Што го прави X2 различен?
X2 се разликува од голем број други ролеркостери по таканаречениот четиридимензионален систем. Седиштата можат да ротираат за 360 степени околу пругата, додека возот достигнува брзина од речиси 80 милји на час, односно околу 129 километри на час.
Целото возење трае приближно две минути и вклучува нагли промени во движењето и забрзувањето.
И покрај предупредувањата кои, според адвокатите и медицинските експерти, со години пристигнувале од посетители и други засегнати страни, атракцијата продолжила да работи.
X2 се наоѓа во Six Flags Magic Mountain во Валенсија, Калифорнија, а според наводите во истрагата, операторот и државните регулатори дозволиле атракцијата да продолжи со работа до ова лето.
