Најмалку четири лица се повредени откако вооружено лице денеска отворило оган пред средно училиште во западниот дел на Турција.
Пукотницата се случила пред средното стручно и техничко училиште во Тургутлу, град кој се наоѓа во областа Маниса. По инцидентот, на местото веднаш биле испратени полициски и медицински екипи.
Информацијата за пукањето ја потврдила Канцеларијата на гувернерот на Маниса, од каде што било соопштено дека надлежните служби се на терен и преземаат активности по инцидентот.
Според информациите објавени од „Хабертурк“, напаѓачот користел пушка и пукал кон учениците кои пристигнувале во училиштето. Во нападот биле повредени најмалку четири лица, а првичните информации укажуваат дека повеќето од повредените се ученици.
Засега нема официјални информации за мотивот што стои зад нападот, а околностите под кои дошло до пукањето се истражуваат.
Инцидентот повторно го отвори прашањето за безбедноста во турските училишта, бидејќи се случува само пет месеци по два сериозни напади во образовни институции во земјата.
На 15 април, во Кахраманмараш, 14-годишен ученик отворил оган во две училници. Во тој напад животот го загубиле 10 лица – наставник и девет ученици, додека уште 13 лица биле повредени. Напаѓачот исто така починал.
Само еден ден претходно, напад се случил во средно стручно училиште во Сиверек, во покраината Шанлиурфа. Поранешен ученик отворил оган кон ученици и вработени во училиштето, при што биле ранети 16 лица, меѓу кои 10 ученици и четворица наставници. По нападот, тој си го одзел животот.
По овие два сериозни инциденти, турското Министерство за образование најавило дополнителни мерки за зголемување на безбедноста во училиштата.
Мерките опфаќале поголема координација и соработка меѓу надлежните институции, засилена контрола на влезовите и излезите во училиштата, како и активности за полесно препознавање и навремено реагирање во потенцијално ризични ситуации.
Најновиот случај во Тургутлу повторно ја стави безбедноста на учениците и вработените во училиштата во фокусот, додека истрагата треба да утврди што точно довело до денешната пукотница и кој бил мотивот за нападот.
