Најмалку четири лица загинаа, а 20 се повредени во израелските воздушни напади врз подрачјето на Набатије во јужен Либан, објави либанската државна новинска агенција ННА.
Во нападите била погодена и целосно уништена болницата „Гандур“ во местото Ал-Набатије ал-Фаука. Објектот со години не бил во функција, а според информациите, и таму има повредени лица.
Силен воздушен удар бил извршен и во самиот град Набатије, каде што била погодена историска зграда во сопственост на братот на пратеникот Насер Џабер. Објектот во минатото бил ресторан, но по нападот е целосно уништен.
Голема материјална штета е причинета и на зградите на регионалното одделение за финансии и одделението за земјоделство во Набатије, кои се наоѓаат во близина на погодената локација. Оштетени се канцеларии, искршени се прозорци и врати, а документи и списи биле расфрлани низ просториите.
Во нападите биле оштетени и десетици продавници и кафулиња во околината.
Претходно израелската војска соопшти дека либанската група Хезболах со два дрона ги нападнала израелските војници во јужен Либан. Припадниците на Израелските одбранбени сили собориле еден од дроновите, а според ИДФ нема повредени израелски војници.
Од израелската војска нападот го оценија како сериозно прекршување на договорот за прекин на огнот меѓу Израел и Либан, по што биле извршени воздушни напади врз цели во јужен Либан.
Израелскиот портал Ynet, повикувајќи се на безбедносни извори, објави дека болницата во Набатије не била во употреба и дека Хезболах наводно ја користел како база. Овие тврдења не можеле независно да бидат потврдени.
