Тензиите на Блискиот Исток повторно се зголемија, откако јеменското движење Хути соопшти дека ќе возврати на воздушните напади што, според нив, ги извршила коалицијата предводена од Саудиска Арабија врз цели во Јемен.
Според медиумите под контрола на Хутите, нападите врз цивилни објекти нема да останат без одговор, а движењето најави дека ќе преземе одмазднички мерки.
Од друга страна, саудиската воена коалиција соопшти дека операцијата била изведена како реакција на претходен напад врз брод што пловел под саудиско знаме. Портпаролот Турки ал-Малики изјави дека биле погодени легитимни воени цели на Хутите во јеменската покраина Ходеида, кои, според него, биле поврзани со заканите за бродскиот сообраќај во Црвеното Море.
Медиуми блиски до Хутите објавија дека во нападите биле погодени објекти во пристанишниот град Ходеида, меѓу кои и државната телекомуникациска компанија, како и цели на островот Камаран.
Во меѓувреме, иранскиот медиум „Прес ТВ“ објави дека Хутите возвратиле со напади на територијата на Саудиска Арабија. Според тие информации, биле регистрирани експлозии во пристанишниот град Јанбу, а ракетен напад бил изведен и врз крајбрежниот град Џазан. Независна потврда за овие тврдења засега нема.
