Американскиот претседател Доналд Трамп го именуваше својот долгогодишен советник Стивен Милер за нов шеф на кабинетот на Белата куќа, на местото на Сузи Вајлс. Одлуката доаѓа по изборниот пораз на Републиканската партија на меѓуизборите, на кои демократите ја презедоа контролата врз двата дома на Конгресот.
Милер, кој досега беше заменик-шеф на кабинетот задолжен за политички прашања, треба официјално да ја преземе новата функција на 9 ноември, соопшти Трамп.
Тој важи за еден од најблиските и највлијателните соработници на американскиот претседател, а особено е познат по улогата во креирањето на строгата имиграциска политика на администрацијата, вклучително и масовните депортации и мерките што доведоа до разделување на мигрантските семејства.
„Њујорк тајмс“ го опишува како еден од главните архитекти на најстрогите политики на Трамп во однос на границите и имиграцијата.
Сузи Вајлс заминува по изборниот пораз на републиканците
Со именувањето на Милер, на функцијата шеф на кабинетот завршува мандатот на Сузи Вајлс, долгогодишна соработничка на Трамп и првата жена што ја извршувала оваа позиција во Белата куќа.
Вајлс поднесе оставка, а според информациите на американските медиуми, нејзиното заминување следува по изборните порази на републиканците. Таа, сепак, треба да продолжи со работа во политичката организација на Трамп.
„Беше животна чест да му служам на претседателот Трамп во Белата куќа. Многу сум горда што бев дел од сè што постигнавме заедно – од обезбедувањето на границата и намалувањето на даноците до зајакнувањето на економијата и спроведувањето на политиката „Америка на прво место““, напиша Вајлс на социјалните мрежи.
Трамп, пак, ја пофали работата на својот нов избор.
„Стивен е со мене од самиот почеток. Тој ги разбира работите, многу е добар во политиката. Одлично ќе ја извршува работата. Тој е извонреден менаџер“, изјави претседателот при заминувањето од Белата куќа.
Милер е еден од главните застапници на строгата имиграциска политика
Стивен Милер со години има значајна улога во обликувањето на имиграциската политика на Трамп. Тој се залагаше за построги мерки кон мигрантите, укинување на програмата DACA, која обезбедува заштита од депортација за одредени лица пристигнати во САД како деца, како и за ограничувања на влезот во земјата за државјани на повеќе муслимански земји.
Неговото име се поврзува и со политиката на разделување на мигрантските семејства на американско-мексиканската граница.
Милер беше активен и во политичките расправии за изборните резултати. За време на кампањата за меѓуизборите често ги напаѓаше демократите на социјалните мрежи, нарекувајќи ги „екстремисти, чудаци и лудаци кои ја мразат Америка“, а ги поддржуваше и тврдењата на Трамп за наводни изборни неправилности во Калифорнија и Алјаска, за кои не беа приложени докази што би ги потврдиле.
Демократите со остри реакции за именувањето
Одлуката на Трамп предизвика остри реакции кај демократските претставници. Конгресменот Роберт Гарсија од Калифорнија оцени дека претседателот, наместо да ги преиспита политиките по изборниот пораз, дополнително ги зацврстува.
„Само неколку дена откако американскиот народ ја отфрли неговата корумпирана и беззаконска власт, Доналд Трамп дополнително ја засилува истата политика“, изјави Гарсија.
Тој го обвини Милер дека стои зад спорните акции на Службата за имиграција и царина (ICE), кои, според неговите зборови, предизвикале страв во заедниците и довеле до сериозни последици за американските државјани и мигрантските семејства.
Слична реакција имаше и лидерот на демократите во Претставничкиот дом, Хаким Џефрис, кој го нарече Милер „опасен ксенофоб и непромислен екстремист“. Тој порача дека неговото назначување дополнително ќе ги заостри политичките судири во Вашингтон.
Пред него претстојат тешки преговори со Конгресот
Именувањето на Милер доаѓа во момент кога администрацијата на Трамп се соочува со зголемен политички притисок по изборниот пораз на републиканците. Според истражување на Асошиејтед прес спроведено меѓу гласачите на меѓуизборите, околу шест од десет испитаници сметале дека администрацијата отишла предалеку во спроведувањето на имиграциските мерки.
Новата функција ќе бара од Милер да соработува и со Конгресот, во кој демократите ќе имаат посилна позиција. Тоа би можело да биде особено предизвикувачко со оглед на неговите долгогодишни судири со демократските претставници.
Дополнително внимание привлече и неговата претходна реакција кон Џејмс Таларико, кој ја освои демократската номинација за кандидат за Сенатот во Тексас. Милер на социјалните мрежи го опиша Таларико како „првиот трансродов кандидат за Сенат“, по што Демократската партија реагираше со кратка порака со која го повика да замолчи.
Таларико сега би можел да биде дел од Сенатот со кој новиот шеф на кабинетот ќе мора да соработува во спроведувањето на политиките на администрацијата.
