Претседателот на Франција, Емануел Макрон, го повика сирискиот претседател Ахмед ал Шара да се приклучи на меѓународната коалиција за борба против терористичката „Исламска држава“ (ИД). Средбата се одржа на маргините на меѓународната конференција за климата КОП 30 во Белем, Бразил.
Макрон потсети на терористичките напади во Париз во 2015 година и нагласи дека тие биле планирани од Сирија, додавајќи дека безбедноста на Французите е приоритет. Тој очекува Сирија да се вклучи во борбата против терористичките групи и да помогне во воспоставување територијален интегритет и враќање на бегалците во земјата.
Претседателот на Франција, исто така, ја поздрави одлуката на Советот за безбедност на ОН да ги укине санкциите против Ал Шара, што се случи пред неговата историска посета на Белата куќа следниот понеделник. Велика Британија исто така ги укина санкциите против сирискиот лидер и министерот за внатрешни работи Анас Хасан Хатаб.
Ал Шара, по соборувањето на режимот на Башар ал Асад, ја расформираше својата групација „Хајат Тахрир ал Шам“ (поранешен огранок на Ал Каеда), која во 2016 година официјално ги прекина врските со Ал Каеда и се обиде да го подобри својот имиџ.
