Парламентот на Србија во петокот изгласа посебен закон со кој се овозможува забрзано уривање на разурнатата зграда на Генералштабот на поранешната Југословенска армија, лоцирана во центарот на Белград. На нејзино место се планира изградба на луксузен хотел поврзан со Џеред Кушнер, зетот на поранешниот американски претседател Доналд Трамп.
Проектот, кој е дел од инвестициската иницијатива на фирмата Affinity Partners со седиште во Мајами, предизвикува бурни реакции во јавноста поради неговата симболика и потенцијалното уништување на објект со историска и културна вредност.
Зградата на Генералштабот беше делумно уништена за време на НАТО-бомбардирањето во 1999 година и се смета за еден од најзначајните архитектонски споменици од тој период. Архитекти и експерти за културно наследство предупредуваат дека нејзиното рушење би претставувало „опасен преседан“ и бришење на дел од колективната меморија.
„Оваа зграда е архитектонско ремек-дело и треба да остане во јавна употреба како споменик на жртвите“, изјави архитектот Миљан Салата.
И покрај бројните реакции, Affinity Partners потпиша договор со српската влада за долгорочен закуп од 99 години, а проектот го поддржува и самиот претседател Александар Вучиќ, кој повеќепати се сретнал со Кушнер во Белград.
Еден од партнерите во проектот е Eagle Hills, компанија од Обединетите Арапски Емирати, позната по контроверзната реконструкција на белградскиот кеј.
Проектот беше привремено стопиран во мај, откако се појавија сомневања за фалсификувани документи со кои зградата била ослободена од статусот на заштитено културно добро. Истрагите сè уште се во тек, но со новиот закон, реконструкцијата е прогласена за „итна“, што овозможува издавање дозволи и одобренија без дополнителни процедури.
Законот беше усвоен со 130 гласа „за“ и 40 „против“, со што проектот официјално доби зелено светло.
Истовремено, Белград повторно се соочува со јавен револт и протести, поттикнати не само од контроверзниот проект, туку и од незадоволството поради трагичната несреќа на железничката станица во Нови Сад минатата година, кога загинаа 16 лица. За време на гласањето пред парламентот се собра мала група демонстранти кои бараа одговорност и правда за жртвите, како и за коруптивните практики поврзани со државните инфраструктурни проекти.
