Српското Министерство за внатрешни работи вечерва соопшти дека спровело широка полициска акција на неколку локации во Белград, Зворник и Бања Лука, при што биле приведени неколку лица осомничени дека се поврзани со случајот познат како „уфрлени снајперисти“.
Во операцијата, како што е наведено во официјалното соопштение, учествувале припадници на МВР и на Безбедносно-информативната агенција (БИА). Истрагата продолжува со цел да се утврдат сите детали и околности околу овој случај кој предизвика големо внимание во јавноста.
Претседателот на Србија, Александар Вучиќ, претходно оваа недела изјави дека безбедносните служби располагаат со сериозни информации во врска со потенцијална закана, откривајќи дека во Белград наводно пристигнале двајца снајперисти. Тој притоа нагласи дека службите веќе неколку дена се во потрага по нив.
„Моментално сме во потрага по двајца снајперисти во Белград, за кои знаеме дека се во градот, но не можеме да ги лоцираме веќе три дена. Се надевам дека ќе успееме. Знаеме од каде доаѓаат парите, а целите сè уште се утврдуваат,“ изјави Вучиќ, додавајќи дека државните органи се решени целосно да го расветлат случајот.
Овој настан отвори бројни прашања во јавноста, особено поради тоа што досега не се откриени ниту идентитетите на уапсените, ниту целите на наводните снајперисти. Српските власти најавуваат дека јавноста ќе биде навремено информирана по завршувањето на истрагата.
