Мајката на убиената Колин Слемер, Меј Мартинез, проговори по неуспешниот обид за егзекуција на Криста Пајк и изјави дека уште пред постапката имала чувство дека смртната казна нема да биде извршена.
Криста Пајк (50), осудена на смрт за убиството на 19-годишната Колин Слемер, преживеа обид за егзекуција со смртоносна инјекција во Тенеси.
Според нејзиниот правен тим, Пајк сега е свесна, зборува и продолжува да прима интензивна медицинска нега.
Адвокатите соопштија дека таа претрпела сериозни повреди на рацете за време на постапката и дека нејзината здравствена состојба и понатаму бара внимателно следење.
Меј Мартинез, мајката на жртвата, за американски медиуми изјавила дека имала претчувство оти Пајк нема да почине за време на егзекуцијата.
Таа признала дека сè повеќе ја губи надежта дека државата ќе успее да ја изврши смртната казна.
На прашањето што би сакала да се случи доколку властите повторно се обидат да ја погубат Пајк, Мартинез одговорила дека нејзиното мислење, според неа, повеќе не е важно и дека институциите ќе ја донесат одлуката.
Според адвокатите, за време на неуспешната егзекуција на Пајк ѝ биле дадени две дози пентобарбитал.
Правниот тим тврди и дека имало најмалку седум обиди за поставување интравенски пристап, при што една од иглите наводно била извадена свиткана.
По постапката, Пајк била префрлена од затворот со максимално обезбедување „Ривербенд“ во Нешвил во болница во критична состојба, каде извесен период била приклучена на апарати за дишење.
Нејзините адвокати сега велат дека таа е свесна и комуницира, но дека закрепнувањето ќе биде долго и неизвесно.
Неуспешната егзекуција отвори и сериозни правни прашања околу тоа дали државата воопшто ќе може повторно да се обиде да ја изврши смртната казна.
Правни експерти посочуваат дека, доколку затвореникот поради евентуално мозочно оштетување не е способен да ја разбере постапката и казната што го очекува, тоа може да претставува пречка за нов обид за егзекуција.
Адвокатите на Пајк побараа од гувернерот на Тенеси, Бил Ли, нејзината смртна казна да биде заменета со доживотен затвор без можност за условно ослободување.
Тие поднесоа и барање да бидат зачувани сите докази од просторијата за егзекуција, вклучително и медицинските материјали, снимките, сведочењата и комуникациите поврзани со постапката.
По инцидентот, гувернерот Бил Ли ги стопираше сите преостанати егзекуции во Тенеси до крајот на годината и нареди независна истрага за причините што довеле до неуспехот.
Во меѓувреме, комесарот на затворскиот систем во Тенеси, Френк Страда, поднесе оставка.
Случајот на Криста Пајк и понатаму предизвикува големо внимание во САД, додека нејзината здравствена состојба и понатамошната правна постапка остануваат неизвесни.
