Поранешната телевизиска водителка Анџелин Мок (48) е осудена на доживотен затвор откако претходно се изјаснила за виновна за убиството на својата 80-годишна мајка, Анита Аверс.
Пресудата ја изрекол судијата Џефри Геринг на 5 октомври, а според американските медиуми, Мок ќе може да побара условно ослободување по 25 години.
Случајот потекнува од ноември 2025 година.
Според судската документација, Мок самата се јавила на бројот 911 и им кажала на операторите дека нејзината мајка наводно се обидела да ја убие и дека таа ја избодела во самоодбрана.
Кога полицијата пристигнала на местото, Мок била затекната на улицата пред домот на мајка си.
Анита Аверс била пронајдена во кревет со повеќе убодни рани, а во нејзина близина биле пронајдени неколку кујнски ножеви и други предмети со траги од крв.
Истражителите навеле и дека на чаршафот биле забележани повеќе дупки кои, според нив, одговарале на убодни повреди.
Полицијата соопштила дека Мок во текот на истрагата повеќепати ја менувала верзијата за тоа што се случило.
Во една од изјавите таа тврдела дека влегла во собата на мајка си за да разговара за претстојно интервју за работа во телевизиска станица.
Според нејзиното тврдење, тогаш ја видела мајка си со ножеви и подоцна дошло до конфликт, при што Мок инсистирала дека постапила во самоодбрана.
Сепак, обвинителството го продолжило случајот, а таа подоцна се изјаснила за виновна за убиство.
Пред изрекувањето на казната, Мок не му се обратила на судот.
На рочиштето била прочитана изјава од член на семејството, во која било нагласено колку тешко трагедијата ги погодила најблиските на убиената жена.
Правниот тим на Мок соопштил дека таа нема намера да поднесе жалба на пресудата.
