Сериозни поплави и свлечишта го зафатија Југоисточна Азија, однесувајќи повеќе од 1.000 животи во Индонезија, Тајланд и Шри Ланка, додека стотици лица се водат како исчезнати. Во Индонезија бројот на загинати достигна 502, а уште 508 лица се исчезнати.
Во Шри Ланка бројот на жртви надмина 350, додека уште толку се водат како исчезнати. Главниот град Коломбо беше најтешко погоден, но со прекинот на врнежите се очекува водите постепено да се повлекуваат. Во земјата се распореди војска за помош на погодените, додека спасувачките екипи се обидуваат да стигнат до најтешко погодените области.
Јужниот дел на Тајланд забележа најмалку 176 жртви, а во Малезија се пријавени два смртни случаи. Поплавите се резултат на ретка тропска бура формирана во Малачкиот Проток, која предизвика поројни дождови и силни ветрови, отежнувајќи ги напорите на спасувачите.
Во Индонезија се уништени околу 28.000 домови, а погодени се 1,4 милиони луѓе, додека во Тајланд поплавите погодиле осум јужни региони со околу три милиони жители.
Шри Ланка се соочува со најлошите поплави во последната деценија. Циклонот Дитва предизвика свлечишта и сериозни штети, погодени се повеќе од половина милион луѓе, а спасувачите работат на расчистување на патиштата и доставување помош. „Ова е првпат целата земја да биде погодена од ваква природна катастрофа“, изјави претседателот Анура Кумара Дисанајаке.
