Трагичен и бизарен настан ја потресе јавноста во Сплит. Маж кој бил приведен од полицијата проголтал дрога додека бил во станица, а обидот на полицајците да му ја отстранат содржината заврши со катастрофални последици.
Според официјалните информации, човекот одбил да соработува при испитувањето и давал неразбирливи одговори, што ги навело полицајците да посомневаат дека крие нешто во устата. Кога го замолиле да исплука, тој продолжил да џвака, а во еден момент дури го каснал и полицаецот.
Полицијата успеала да извлече мала количина бела материја, која подоцна била идентификувана како дрога. Итната медицинска помош веднаш била повикана, а мажот бил пренесен во болница. За жал, околу три часот наутро беше констатирана смрт.
Надлежните институции веднаш започнаа истрага, а случајот ќе биде дополнително разјаснет по извршената обдукција. Овој настан ја отвори јавната дебата за безбедноста и ризиците при полициските интервенции, но и за опасностите од дрогата.
