Српскиот претседател Александар Вучиќ денеска соопшти дека од вторник рафинеријата „Нафтена индустрија на Србија“ (НИС) во Панчево ќе престане со работа, пренесува регионалниот сервис на Радио слободна Европа (РСЕ). Тој додаде дека граѓаните не треба да паничат, бидејќи државата има повеќе решенија за ситуацијата.
Вучиќ најави дека ќе се обиде да има дополнителни разговори со американските власти уште вечерва, но не очекува дека тие ќе ја променат својата одлука. Тој посочи дека не очекува НИС да добие продолжена лиценца од САД, што значи дека рафинеријата од вторник ќе запре со работа.
Претседателот додаде дека не ја разбира логиката и тактиките на САД во однос на НИС и продолжувањето на дозволата за работа на компанијата.
Србија побара обнова на лиценцата за работа на НИС, додека во тек се преговори за промена на сопственоста во компанијата под санкции на САД. Вучиќ истакна дека американските власти се информирани за тоа дека Србија ги почитува нивните санкции и дека се работи на промена на сопственоста во рок од педесет дена, со гаранции од државата.
Американските санкции против НИС стапија на сила на 9 октомври, со цел да се спречи Русија да ги користи приходите од енергија за војната во Украина. Пред тоа, санкциите биле одложувани осум пати.
Во 2008 година, Србија продаде 51% од акциите на НИС на руската државна компанија „Газпром нефт“ за 400 милиони евра без тендер. Во меѓувреме, сопственичката структура на НИС се променила неколку пати, но компанијата сè уште е претежно во рацете на руски компании, додека Србија има 29,87% од акциите.
Вучиќ истакна дека е речиси сигурен дека американскиот претседател Доналд Трамп не е запознаен со деталите, но дека високи функционери во Стејт департментот се свесни за состојбата на НИС и дека ова е политика што ја поддржуваат.
Тој додаде дека Србија има гасен аранжман со Русија до 1 јануари и дека ќе се обиде повторно да преговара за негово продолжување.
