Саудиска Арабија планира да отвори две нови продавници за алкохол, вклучувајќи една за немуслиманскиот странски персонал во државниот нафтен гигант „Арамко“, додека кралството дополнително ги ублажува ограничувањата, изјавија извори за „Ројтерс“.
Отворањето продавници во источната покраина Дахаран и за дипломати во пристаништето Џеда се смета за значаен чекор во напорите предводени од престолонаследникот Мохамед бин Салман за отворање на земјата.
Минатата година, Саудиска Арабија отвори продавница за алкохол за немуслимански дипломати во Ријад – прва по 73 години забрана. Новата продавница во Дахаран ќе биде во комплекс на „Арамко“, додека трета продавница за дипломати се планира во Џеда.
До отворањето на првата продавница, алкохолот во Саудиска Арабија главно беше достапен преку дипломатска пошта, црниот пазар или домашно производство. Во другите земји од Персискиот Залив, освен Кувајт, алкохолот е достапен со ограничувања.
Иако алкохолот останува недостапен за мнозинството население, реформите на Мохамед бин Салман воведуваат опуштање на општествените правила – од дозволување жените да возат, до намалување на овластувањата на верската полиција и одобрување на јавни активности некогаш забранети, како танци и одење во кино.
Кралството ги ублажува ограничувањата за да привлече туристи и меѓународни компании, дел од амбициозниот план за диверзификација на економијата. Сепак, ултралуксузните одморалишта во рамките на проектот „Црвено Море глобал“ ќе останат без алкохол. Саудискиот министер за туризам, Ахмед Ал-Катиб, истакна дека засега нема промена во правилата за алкохол за туристите, но остави простор за толкување дека тоа може да се смени во иднина.
