Гласачите во Швајцарија со огромно мнозинство го отфрлија предлогот за воведување данок од 50 проценти на наследство над 50 милиони швајцарски франци (околу 62 милиони долари), според првичните проценки на јавниот радиодифузен сервис SRF.
Според резултатите, 79 проценти од гласачите се против „данокот на најбогатите“, кој го предложи младинското крило на левичарската Социјалдемократска партија. Целта на мерката беше собирање средства за проекти за намалување на влијанието на климатските промени.
Отфрлањето на предлогот беше очекувано, бидејќи две третини од испитаниците во последните анкети изразија противење. Банкарските кругови внимателно го следеа гласањето како индикатор за расположението на граѓаните кон прераспределба на богатството, особено откако други европски земји, како Норвешка, воведоа или размислуваат за слични мерки.
Швајцарија е позната по високите трошоци за живот, а незадоволството на граѓаните од нив се рефлектира и во политиката. Противниците на предлогот предупредуваат дека данокот би можел да го поттикне иселувањето на богатите и намалување на вкупните даночни приходи. Швајцарската влада, исто така, повика на отфрлање на мерката.
