Швајцарците денеска излегуваат на референдум за тоа дали да воведат данок на наследство од 50% за супербогатите, во време кога владите ширум светот се соочуваат со прашањето како да го оданочат огромното богатство.
Овој референдум е еден од најконтроверзните во поновата швајцарска политичка историја и ја отсликува глобалната дилема меѓу земјите што се обидуваат да привлечат богати семејства со фискални олеснувања и оние што сакаат да воведат данок на прекумерното богатство.
Предлогот на крајно левичарската партија Млади социјалисти предвидува воведување федерален данок на наследство и подарок од 50% за средства и трансфери над 50 милиони швајцарски франци. Ова би претставувало голем пресврт во традицијата на Швајцарија за децентрализирано и ниско оданочување, при што даночните приходи ќе бидат наменети за трошоци поврзани со климатските промени.
