Во четврток, православните верници го одбележуваат празникот Воведение во храмот на Пресвета Богородица, во народот познат како Пречиста, кој се слави на 4 декември и е еден од најзначајните празници во православната традиција.
Според црковното предание, на овој ден Пресвета Богородица, придружувана од родителите Јоаким и Ана, за првпат стапила во храмот во Ерусалим. Родителите заветувале дека ако добијат дете, тоа ќе го посветат на Бога. Кога Марија наполнила три години, ја одвеле во храмот.
Пред храмот имало 15 скали. Јоаким и Ана ја поставиле Марија на првата скала, а таа сама се искачила до врвот, каде што ја пречекал првосвештеникот Захарија, таткото на свети Јован Крстител. Тој ја вовел во Светињата над светиите — просторија каде што само поглаварот на свештенството влегувал еднаш годишно.
По принесувањето жртва и добиениот благослов, Јоаким и Ана се вратиле дома, а Марија останала во храмот цели девет години. По смртта на родителите, сакала да продолжи да живее девствено, но по тогашните закони, на 12-годишна возраст била доверена на свети Јосиф како свршеница, за да остане девствена, но формално да го исполни законот. Таа се смета за првата девојка што дала доживотен завет, а нејзиниот пример подоцна го следеле илјадници вернички.
Бидејќи празникот се паѓа во рамки на Божиќниот пост, според црковниот устав е дозволено консумирање риба и масло. Пречиста има посебно значење за жените, а според старите верувања, оние кои долго време не можеле да добијат потомство треба да се помолат и да преноќат во црква за Бог да им ја исполни желбата.
