Многу апарати што секојдневно ги користиме трошаат далеку повеќе струја отколку што изгледа, а нивното погрешно поврзување може да предизвика дефекти, прегревање или дури пожар.
Продолжените кабли се практични и често неизбежни кога нема доволно штекери во домот, но нивната употреба мора да биде внимателна. Дури и ако продолжниот кабел има повеќе приклучоци, тоа не значи дека сите уреди може да се користат истовремено. Одредени апарати мора да бидат поврзани директно во ѕиден штекер за да се избегнат оштетувања, кратки споеви и опасност од пожар.
Најчесто луѓето погрешно ги вклучуваат фрижидерот и замрзнувачот на продолжен кабел, иако производителите јасно предупредуваат дека тие мора да бидат поврзани директно во ѕидот. Големата потрошувачка на енергија, ненадејните промени во напонот и постојаното стартување на компресорот може да го оптовари кабелот, да го прегрее и да предизвика дефект или пожар.
Микробрановите печки, иако често помали по големина, користат голема количина електрична енергија при работа. Ако мора да се користат на продолжен кабел, тој не смее да биде оптоварен со други апарати.
Тостерите, иако мал уред, генерираат висока температура и трошаат повеќе струја отколку што изгледа, што може да доведе до прегревање на кабелот и зголемување на ризикот од пожар.
Најопасни се уредите за затоплување на домот, како греалки и клима уреди, кои користат огромно количество електрична енергија и никако не смеат да се вклучуваат на продолжен кабел. Тие се една од најчестите причини за пожари во домаќинствата поради преоптоварување и прегревање на каблите.
Без разлика дали се работи за фрижидер, микробранова, тостер, клима или греалка – најбезбедно е овие апарати да имаат свој посебен штекер, без дополнително поврзување и без импровизации. Правилното користење на електричната опрема е клучно за безбеден дом, а еден исправно употребен штекер може да направи голема разлика.
