Крајова, град во југозападна Романија, оваа година повторно ја потврдува својата улога како нова зимска атракција во Европа. Центарот на градот е претворен во импозантна зимска магија на повеќе од 280.000 м², инспирирана од класичниот балет „Оревокршачот“.
Саемот се протега низ плоштадот „Михај Витеазул“, просторот околу Националниот театар, како и централната пешачка зона, нудејќи спектакуларни светлосни инсталации, гигантски декорации и тематски украси кои го претвораат градот во бајковита сцена.
Отворен од 14 ноември 2025 година до 4 јануари 2026, саемот ја привлекува вниманието на туристи од целиот континент. Посетителите можат да уживаат на највисоките „летечки“ санки во источна Европа, да се возат на големото панорамско тркало со панорамски поглед врз градот или да лизгаат на отвореното лизгалиште. Влезот е бесплатен, а активностите се достапни по симболична цена.
Во рамките на саемот се поставени околу 90 рачно декорирани куќички кои нудат разни рачно изработени подароци, традиционални празнични украси, локални производи и гастрономија карактеристична за источна Европа. Кулинарската понуда претставува вистинска мешавина од вкусови на Азербејџан, Ерменија, Грузија, Грција, Северна Македонија, Унгарија, Украина, Турција, Бугарија и Србија. Најпопуларни деликатеси се „gogosi“ – меки, топли крофни посипани со шеќер, како и „cozonac“, празничен десерт сличен на маковник или оревник.
На штандовите посетителите можат да уживаат и во класични зимски специјалитети – печени колбаси, густ зимски гулаш, разни печива и ароматично греано вино со цимет, каранфилче и агруми.
Минатата година, божиќниот саем во Крајова беше прогласен за втор најдобар во Европа според платформата European Best Destinations, веднаш по Гдањск. Со комбинацијата од зимска магија, културни програми, гастрономија и спектакуларни светлосни инсталации, Крајова се издвојува како ново омилено празнично прибежиште за патниците од целиот континент.
