Пет европски земји ја нарачале најновата верзија на борбениот тенк „Леопард 2“, потврди портпаролот на француско-германската група за вооружување „КНДС“. Најновата надградба на тенкот, кој првпат се појави во 1979 година, е наменета за Германија, Холандија, Норвешка, Литванија и Чешка, а вкупно се добиени 350 нарачки.
Германската војска нарачала 123 тенкови, за што владата очекува да потроши повеќе од 3,4 милијарди евра. Министерот за одбрана Борис Писториус додаде дека планира да побара одобрение за уште 75 тенкови.
Новата верзија „А8“ е опремена со систем за заштита од израелскиот производител „Рафаел“, дизајниран да пресретнува проектили и беспилотни летала пред удар.
Иако „КНДС“ не ги откри деталите од договорите, сегашните нарачки веќе изнесуваат неколку милијарди евра и ќе го одржат производството со години. Еден тенк „Леопард 2“ чини десетици милиони евра, со дополнителни трошоци за одржување и сервисирање.
