Аеродромот во Вилнус, главниот град на Литванија, повторно привремено ја прекина работата поради сомнителни балони во воздушниот простор, соопштија властите. Овој инцидент е последен во низата прекини на летовите во балтичката земја.
Европската авијација се соочува со сè почести проблеми во последните месеци поради појава на дронови и упади во воздушниот простор, вклучително и на аеродромите во Копенхаген и Брисел. Аеродромот во Вилнус од почетокот на октомври бил затворен најмалку десет пати.
Литванските власти објаснуваат дека балоните што ги користат шверцерите за транспорт на цигари претставуваат безбедносен ризик и го обвинуваат белорускиот претседател Александар Лукашенко дека ја дозволува оваа практика, која ја опишуваат како „хибриден напад“.
Минатиот месец Литванија привремено ги затвори двата гранични премини со Белорусија како одговор на ваквите инциденти, но минатата недела ги отвори повторно откако прекините во воздушниот сообраќај привремено престанаа. Лукашенко пак го нарече затворањето на границата „лудило“ и „измама“, обвинувајќи го Западот за водење хибридна војна против Белорусија и Русија.
