Воздушниот сообраќај на аеродромот во Катанија е нарушен поради засилената активност на вулканот Етна и исфрлањето вулкански пепел од неговите кратери. Облакот од пепел се издигнува на височина од околу четири километри, што претставува сериозна опасност за авионскиот сообраќај.
Поради вулканскиот облак, аеродромските операции се привремено прекинати, а ограничувањата се воведени поради ризикот што вулканскиот пепел го претставува за авионските мотори и безбедноста на летовите.
Националниот институт за геофизика и вулканологија (INGV), преку Опсерваторијата во Катанија, издаде црвено VONA предупредување за авијацијата. Тоа е највисокото ниво на предупредување на четиристепената скала и се користи кога вулканската активност и пепелта претставуваат опасност за воздушниот сообраќај.
Етна и во изминатиот период имаше повеќе епизоди на засилена активност, при што INGV неколкупати го подигаше авијацискиот степен на предупредување на црвено поради емисиите на пепел.
Властите внимателно ја следат состојбата, а понатамошното одвивање на воздушниот сообраќај ќе зависи од развојот на вулканската активност и движењето на облакот од пепел.
