Франција ја обвини Иранската револуционерна гарда дека стои зад големите кибернетички напади врз системите за ладење во стотици европски супермаркети, кои предизвикаа уништување огромни количества храна и милионски финансиски загуби.
Францускиот министер за надворешни работи Жан-Ноел Баро изјави дека станува збор за напад од невидени размери, најавувајќи дека Париз ќе побара санкции против одговорните на ниво на Европската Унија.
Поради случајот, француските власти го повикаа и иранскиот амбасадор, кому му упатија официјален протест.
Според истражителите, зад нападите од 11 и 12 октомври стои хакерската група „Шахид Кавех“, која француските власти ја поврзуваат со Иранската револуционерна гарда.
Напаѓачите успеале далечински да преземат контрола врз софтверот за управување со ладилниците и замрзнувачите во повеќе од 700 француски супермаркети.
Во одредени објекти температурите наводно достигнале дури 50 степени Целзиусови, поради што биле уништени големи количества месо, зеленчук и други прехранбени производи. Пријавени биле и пожари.
На почетокот на ноември следувал нов бран слични напади во повеќе европски држави, меѓу кои Белгија, Луксембург, Шведска, Ирска, Холандија и Естонија.
Сепак, засега не е утврдено дали сите овие инциденти се поврзани со истата група.
Иран ги отфрли француските обвинувања како неосновани, додека истрагата за утврдување на одговорноста продолжува.
