Претставничката на УНИЦЕФ за права на децата, Тес Инграм, предупреди дека е „нехумано“ да се очекува стотици илјади деца да избегаат од Газа, бидејќи импровизираните кампови на југ се преполни, небезбедни и недоволно опремени за сместување на голем број луѓе.
Инграм истакна дека условите во камповите се опасни и несоодветни, а многумина кои успеале да избегат од израелската офанзива дури се враќале во опасните области, бидејќи животот во камповите бил „неподнослив“.
„Нехумано е да се очекува речиси половина милион деца, кои биле повредени и трауматизирани од повеќе од 700 дена немилосрден конфликт, да избегаат од еден пекол и да завршат во друг“, рече Инграм преку видео врска од кампот Маваси.
Таа додаде дека некои од оние што избегаа дури биле убиени додека собирале вода во кампот, а луѓето се соочуваат со избор меѓу опасноста од останување или опасноста од бегство.
Израел денес започна копнена офанзива во Газа и нареди евакуација на жителите, додека ОН известуваат дека повеќе од 140.000 лица веќе побегнале во јужната област, од вкупно околу еден милион жители.
